ABAOK RUBÉN AMÓNEN AZKEN LIBURUA AURKEZTU DU BILBON

Ekitaldia Sociedad Bilbaína-n egin da, non ABAOko presidenteak, Juan Carlos Matellanesek, liburua aurkezteko hitz hauek esan dituen: «Lan hau José Antonio Morante toreatzailearen fenomeno sozial, kultural eta artistikoan murgiltzen da». «Morante, punto y aparte» (Espasa, 2025) liburua berehala bihurtu da salmenta-arrakasta Estatuan.

Rubén Amónek, maisu sevillarra «garai guztietako toreatzailerik onena eta tauromakiaz haragoko kultuzko fenomenoa» dela uste duenak, La Pueblako maisuaren misterioaren atzean zer dagoen aztertu du, eta zergatik eragiten duen haren irudiak hertsiki zezenketaz edo arteaz haragoko interesa, idolo-estatusera igota lehen mailako irudi sozial, politiko eta kultural bihurtzeraino.

Ruben Amónek bere kazetaritza-ibilbide garrantzitsua idazle-jardunarekin uztartzen du; horren adibide, besteak beste zezenketari, futbolari, politikari eta operari buruz idatzi duen dozena bat liburu eta saiakera. Egun, La Cultureta saioa zuzentzen eta aurkezten du astero Onda Cero irratian, eta 2021etik El Hormiguero telesaioko gaurkotasun-tertulian eta Antena 3 telebista-kateko Espejo Público saioan parte hartzen du.

2018az geroztik, ABAO Bilbao Operaren El ABC de la ópera hitzaldi-zikloan parte hartzen du, eta bertan Manon, I lombardi alla prima crociata, La fanciulla del West, Les contes d’Hoffmann, Tosca, Rigoletto, Otello eta, joan den urtarrilean, Werther operak aurkeztu ditu.

Bere literatur ekoizpenean, honako hauek nabarmen daitezke: «El triunvirato. Carreras, Domingo y Pavarotti: cuando la ópera llena estadios», hiru tenorren fenomenoari eskainia; «Sangre, poesía y pasión: dos siglos de música, ruido y silencio en el Teatro Real», antzokiaren bigarren mendeurrenaren harira; eta «Un coloso en el teatro del mundo», Plácido Domingoren biografia.